2022ko ekainaren 4an, Bizkaiko familia batek Lisboatik Bilbora joateko Tap Air Portugal konpainiarekin kontratatutako hegaldiak bost orduko atzerapena izan zuen. Senar-emazteak eta adin txikiko beren bi seme-alabak zihoazen hegazkinean, eta haietako batek, bi urtetik beherakoa zenez, ez zuen eserleku esleiturik.
Bikoteak ERREKLAMATUra jo zuen aire-konpainiari atzerapenagatiko kalte-ordaina erreklamatzeko –250 euro pertsona bakoitzeko–, bai eta gorabeherak eragin zizkien gastuen ordainketa ere, guztira 1.026,56 euro.
Tap Air Portugalek erantzun zuen demanda zati batean onartuta, 769,30 euroko konpentsazioa proposatuz. Aire-konpainiaren esanetan, haurtxoak ez zuen bidaia-txartelik ordaindu eta ez zuen eserlekurik okupatzen hegazkinean, beraz ez zuen atzerapenagatiko konpentsaziorako eskubiderik. Gainera, ez zuen onartu aparkalekuko erreserbako denbora gainditzeagatik demandaren jartzaileek ordaindu behar izan zuten diru-kopurua, bidaiariei eman beharreko asistentziarekin loturarik ez duen kontzeptu bat delako, konpainiaren iritziz.
Bilboko Lehen Auzialdiko 12. Epaitegiak berriki emandako epai batean, ordea, ERREKLAMATUren demanda onartu du eta ebatzi du aire-konpainia zigortzea, eskatutako diru-kopuru osoa ordain dezan.
Lehenengo gaiari buruz, haurtxoagatik eman beharreko konpentsazioaz, epaileak dio frogatuta dagoela haurra bi urtetik beherakoa zela eta eserleku esleiturik gabe bidaiatu zuela, baina egiaztatu da 5,78 € ordaindu zirela erreserbagatik.
Epaiak, puntu horretaz, Europar Batasuneko Justizia Auzitegiko ebazpen bat aipatzen du, non adierazi baitzen hegaldien konpentsazioak arautzen dituen 261/2004 Erregelamendua ezin zaiela aplikatu adinagatik bidaia dohainik egiten dutenei, ontziratze-txartel esleiturik ez eserlekurik ez dutenei eta gurasoek egindako erreserbetan izenez ageri ez direnei.
Baina epailearen ustez ondorio hori ezin dela zuzenean aplikatu kasu honetan, bidaia-txartelak erostean egindako erreserban haur txikiaren izena ageri delako, bidaiari moduan identifikatuta. Gainera, ontziratze txartela eman zen haren izenean eta tasak ordaindu ziren, bidaia txartelari prezio bat ezarrita, beraz.
Horrela, erregelamendu horrek kalte-ordain bat ezartzen du bidaiariarentzat, “ulertuta bidaiaria dela konpainiak garraiatzen duena, eta, horretarako, erreserba bat egin eta txartel bat erosi behar izan duena, txartel horrek eskubidea ematen ez badio ere bere gurasoenaz beste eserleku bat erabiltzeko. Horren froga argia da haurtxoarengatik aireportuko tasak ordaindu behar direla eta ontziratze-txartela duela, eta, horren ondorioz, bidaia-txartela ez da doakoa”, epaiak dioenez.
Era berean, epaitegiak onartu zuen 7,15 euroko kalte-ordaina aparkalekuan erreserbatutako denbora gainditzeagatik, tiketak aurkeztu zirelako eta gainkostu horrek hegaldiaren atzerapenarekin lotura zuzena zuelako.
