Greba 24 ordukoa izango da, eta asteazkeneko 00:00etan hasiko da, baina txandaka lan egiten den enpresetan ordu hori baino lehen hasten den azken txandarekin abiatuko da. Horregatik, astearte gaueko hegaldietan ere izan dezake eragina.
Gutxieneko zerbitzuak Euskal Herriko aireportuetan
Garraio Ministerioak azaroaren 6an sinatutako ebazpenaren arabera, konpainia bakoitzak egun horretan ibilbide bakoitzean programatutako hegaldien ehuneko jakin bat egin beharko du, gutxienez. Hauek dira Euskal Herriko aireportuetako ehunekoak, hegaldi motaren arabera:
Uharteekin, Ceutarekin eta Melillarekin egiten diren hegaldiak, eta zerbitzu publikoko ibilbideak. Bilbo, % 80; Gasteiz, % 71; Donostia, % 63, eta Iruñea, % 59.
Nazioarteko hegaldiak, eta lurrez bost orduko edo gehiagoko alternatiba duten penintsulako hegaldiak. Bilbo, % 56; Gasteiz, % 46; Donostia, % 57, eta Iruñea, % 44.
Lurrez bost ordu baino gutxiagoko alternatiba duten penintsulako hegaldiak. Bilbo, % 32; Gasteiz, % 32; Donostia, % 34, eta Iruñea, % 37.
Adibidez, konpainia batek egun horretan Bilbotik abiatzen den penintsulako ibilbide labur batean hamar hegaldi programatuta bazituen, gutxienez lau hegaldi egin beharko ditu (% 32, gorantz biribilduta). Hori bermatutako gutxienekoa da: hegaldi gehiago irten daitezke langileek grebarekin bat egiten ez badute. Ibilbide batek gutxieneko zerbitzuen ehuneko desberdinak dituzten bi aireportu lotzen baditu, handiena aplikatzen da. Ebazpenak ez du zehazten zein hegaldi utziko diren bertan behera: aire-konpainiek erabakitzen dute hori. Iberiak, Iberia Expressek eta Air Nostrumek dagoeneko aukera ematen diete 11n hegan egin behar dutenei hegaldiaren data azaroaren 26ra arte aldatzeko edo dirua itzultzeko eskatzeko, hegaldia bertan behera utzi ez arren.
“Lehenik eta behin, asteartean aire-konpainiaren mezu elektronikoak eta aplikazioa begiratzea komeni da. Hegaldiari zeure kabuz uko egin aurretik, begiratu konpainiak aldaketak edo diru-itzulketak eskaintzen dituen: hegaldia bertan behera utzi ez badizute eta ez baduzu hegan egiten, txartelaren dirua gal dezakezu”, ohartarazi du Ortizek.
Zer eska dezakezu hegaldia bertan behera uzten badizute
Dirua itzultzea edo beste hegaldi bat: zuk aukeratzen duzu. Aire-konpainiak txartelaren dirua zazpi eguneko epean itzultzea eskaini behar dizu, edo beste hegaldi batean helmugara eramatea, ahalik eta lasterren edo zuri ondoen datorkizun egunean.
Arreta itxaron bitartean. Beste hegaldi bat aukeratzen baduzu, konpainiak janaria eta edaria eman behar dizkizu, eta gaua bertan eman behar baduzu, hotela eta hotelera joateko garraioa. “Horrek ez du zerikusirik hegaldia bertan behera uztearen erantzulea nor den: greba egon edo ez, aire-konpainiak arreta eman behar dizu”, gogorarazi du abokatuak.
Hegaldia atzerapen handiarekin ateratzen bada. Itxaron bitartean janaria eta edaria ere eman behar dizkizute, baita hotela ere hegaldia hurrengo egunera atzeratzen bada. Atzerapena bost ordukoa edo handiagoa bada eta ez bidaiatzea erabakitzen baduzu, txartelaren dirua itzultzeko eskaera egin dezakezu.
Kalte-ordainik ez, baina gainerako guztia bai. Greba orokorra ezohiko inguruabar bat da: aire-konpainiak ezin du saihestu, ezta greba deitu dutenek eskatzen dutena bete ere. Horregatik, hegaldia grebaren ondorioz bertan behera uzten bada edo atzeratzen bada, konpainiak ez du 250, 400 edo 600 euroko kalte-ordaina ordaindu beharrik. Hala ere, dirua itzultzearen eta beste hegaldi bat hartzearen artean aukeratzen utzi behar dizu, eta itxaron bitartean arreta eman behar dizu. “Greba egoteak ez du esan nahi aire-konpainia bidaiariez ahaztu daitekeenik”, adierazi du Ortizek.
Jon Ortiz Larruzea abokatuak ontziratze-txartela, erreserba, aire-konpainiaren jakinarazpenak eta itxaronaldian egindako gastuen tiketak gordetzea gomendatzen du, eta konpainiaren lehen erantzuna besterik gabe ontzat ez ematea. “Zentzuzkoena profesionalekin kontsultatzea da, eta luzatzen diren erreklamazioetan denborarik ez galtzea. ERREKLAMATUn zure kasua doan aztertzen dugu, eta argi esaten dizugu zer dagokizun. Erreklamatzeko zerbait badago, guztiaz arduratzen gara, dirua zure kontuan izan arte, ez duzu dirurik aurreratu behar, eta irabazten badugu bakarrik kobratzen dugu: ez duzu ezer arriskatzen”.
Egilea
